الدوله الدينيه جدا والدوله المدنيه بجد جدا

سلام عليكم رغم انى عارف ان الكلام فى الموضوع دا لابد انه يكون باللغه العربيه الا انى شايف ان كلامى فيه بالعاميه ممكن يكون افضل فى الوقت الحالى الموضوع ببساطه هو حديث الساعه الدوله المدنيه والدوله الدينيه وناس عايزها مدنيه وناس خايفه من انها تكون دينيه طيب نتكلم مع بعض بالراحه نبدا باللى خايفين منه الدوله الدينيه هو يعنى ايه دوله دينيه وايه الامثله عليها -- ناس تقول الدوله الدينيه زى ايران او زى السعوديه او زى افغانستان وناس تقول زى اسرائيل والكل شغال بمبدا اللى خايف من الشوربه ينفخ من الزبادى اولا لم يعرف الاسلام نهائيا الدوله الدينيه نهائيا فى تاريخه حتى دولة رسول الله صلى الله عليه وسلم لم تكن دوله دينيه وبرضه دولة الخلافه الراشده لم تكن دوله دينيه طيب ازاى يبقى لازم نعرف ايه هى الدوله الدينيه وايه امثلتها وليه خدت اللقب ده -- الدوله الدينيه دى دوله بيحكم فيها رجال الدين طيب هو مش الرسول والصحابه كانوا رجال دين كانوا رجال دين طبعا واجمل دين واصح دين واعظم دين طيب يبقى ايه موضوع انها مكنتش دوله دينيه ايوا تكلمة تعريف الدوله الدينيه زى ماقلنا دى دوله بيحكم فيها رجال الدين وبعدين يحكمون فيها بشرع غير شرع الله ويدعون انه شرع الله وبعدين يبعدوا الشعب من كل حقوقه ومن كل اختياراته ومن كل ارائه لانهم طبعا هما اللى عارفين الصح لانهم بيتكلموا باسم الله ودا هو اللى حصل فى اوربا فى العصور الوسطى فى حكم الكنيسه فى العصور المظلمه هما سرقوا وقتلوا وعزلوا الحكام واستولوا على كل حاجه باسم الدين وباسم الله وان دا حكم الله واحنا اللى عارفينه يبقا كله يسكت ومايناقش خالص هى دى الدوله الدينيه الوحده فى المسيحيه فيه حد فيكم شاف دوله فى الاسلام عملت كده طيب ماالرسول كان بيقول ده حرام وحلال واعملوا ومتعملوش ماشى بس دا كان فى امور الدين ولما اتكلم فى امور الدنيا قال ايه قال صلى الله عليه وسلم - انتم اعلم بامور دنياكم - والله دا فعلا رجل عظيم رائع مبدع موحى اليه جميل جدا جدا هذا الحبيب الغالى محمد بن عبد الله بابى هو وامى - طيب وفى صلح الحديبيه لما كتبوا الوثيقه وفى غزوة الخندق لما سالهم نعمل ايه طيب ولما نراجع السيره كلها نلاقى ان الامر كان شورى على طول طيب وسيدنا ابوبكر لما قال - اطيعونى مااطعت الله فيكم فان عصيت الله فلا طاعة لى عليكم - قمة الجمال خلى نفسه هو الملتزم بالشرع وانه هو اللى مطالب بمراعاة الله فيهم مش هو اللى بيتحكم فيهم بالشرع هى دى اهم نقطه احنا طول النهار بنقول عايزين حد يحكمنا ويخاف من ربنا حد يحكمنا ويتقى الله فينا طيب ماهو دا الحكم اللى كلنا ليل ونهار بنطلبه وقدمنا مئات الامثله فى الدوله الاسلاميه الاولى نيجى بقى ندخل على الفاروق الرائع عمر بن الخطاب وشوف بقى اجمل دوله واجمل خليفه للمسلمين ومن وراه على وعثمان وعمر بن عبد العزيز - طيب دا الدوله الاسلاميه الاولى وكانت قمه فى الروعه والجمال ومكنش الحكم دينى ان الحكم بالشرع وكان الشرع على رقاب المحكوم قبل الحكام انما الدوله الدينيه الحاكم فيها بيحكم الناس بغير الدين مدعى انه الدين والدين دا مابيمشيش عليه طبعا لانه هو اللى مالفه وهو طبعا فوق الكلام ده فى العصر الحديث جت ايران وفعلا ايران بدات دوله دينيه جدا يعنى الخومينى دا فيه هناك افتكرته نبى وحكمهم بغير اى دين وغير الدين وعمل نفسه اله واحنا هنا لما بنتكلم عن الشيعه فلازم نعرف اننا بنتكلم عن دين تانى غير الاسلام اسمه دين ولاية الفقيه وحكم الائمه مش حكم الله واحنا هنا زى ايران زى حكم الكنيسه فى العصور المظلمه ميفرقش كتير رغم ان الموضوع اختلف شويه فى ايران الايام دى طيب واحد يقولك اسرائيل دوله دينيه انا شايف ان اسرائيل دوله مجرمه ومش دينيه دى صهيونيه والصهيونيه غير اليهوديه ممكن حد يختلف معايا بس دا راى ومش هو دا مربط الفرس فى موضوعنا خالص وبكره هكمل معاكم الكلام عن الدوله الدينيه والدوله المدنيه اسال الله لى ولكم السعاده فى الدنيا والاخره - اخوكم الفتى العايش